Zumhnak Pinah i Chap U!

2 Peter 1: 3-7

3 Pathian sunparnak le thatnak i hrawm ve awkah a kan kotu kan hngalhnak thawngin Pathian tihzah in nun awkah kan herhmi thil vialte cu amah Pathian thawnnak lila nih cun a kan pek. 4 Cuticun a ngan ngaingaimi le a sung ngaingaimi laksawng a kan kamhmi cu a kan pek i cu laksawng a kan pekmi thawng cun a kan hrawkhral khotu vawlei pumsa duhnak chung hin nan luat kho lai i Pathian sining cu nan i hrawm kho lai. Hi ruang hrimhrim ah hin, nan zumhnak i thatnak chap kha fak piin i zuam u; cun nan thatnak ah khan hngalhnak i chap u; 6 nan hngalhnak ah khan mah le mah uk khawhnak i chap u; mah le mah i uk khawhnak ah khan in khawhnak i chap u; in khawhnak ah khan Pathian tihzahnak i chap u; Pathian tihzahnak ah khan unau bantukin i dawtnak i chap u law unau bantukin i dawtnak ah khan zawnruahnak i chap u.

Pathian nih nifatin kan nunnak ah kan herhmi thil vialte hi a lak in a kan pek dih cikcek timi kong cu Sernak tuanbia ah fiang tein kan hmuh khawh. Sernak tuanbia kan zoh ṭhan tikah Pathian nih minung cu ni 6nak ah a ser. Zei ruang ahdah Pathian nih Minung hi ni 6nak theng ah a ser hnga? timi biahalnak a vun chuak. Pathian nih minung kan herhmi a theihhngalh dih cikcek caah ni 6nak ah minung a rak ser hi a si. Minung cu muihnak le ceunak, thli, thingkung, saram, le ti tibantuk tel loin a nung khomi kan si lo. Cucaah, minung kan herhmi thil vialte a kan ser piak dih hnu ah minung a kan ser. Pathian cu kan duhmi nakin kan herhmi tu thluachuah a kan petu a si.

Pathian ṭihzah nun kan ngeih khawh nakhnga a kan sertu Pathian kan hngalh hmasa a herh. Pathian theihhngalh cu nunnak hrampi a si tiah Johan 17: 3 ah “Jesuh Khrih hngalh hi nunnak cu a si,” tiah kan hmuh khawh. A chuakka ngakchia nih thaw a ngeih hmasa lai, a ṭap lai, cun hringtu a nu le a pa bantuk in a ṭhudir. Hringtu a nu le a pa sining kha aa hrawm. Cu ve bantukin kan nih zong a kan sertu Pathian sunparnak le ṭhatnak i hrawm ve awkah auhmi kan si. Cucaah, kan nih kan rian cu Pathian ṭihzah in nun kha a si. Cu bantuk nunnak kan ngeih khawh nakhnga fim a kan chimtu cu Pathian ṭhawnnak lila tu kha a rak si.

Pathian nih laksawng a kan pekmi hi a man in khiah khawhmi a si lo. A sunglawi tuk hringhran. Cu a sunglawi tukmi laksawng thawngin hi vawlei pum taksa duhnak chung in nan nih cu nan luat, lai tiah biakamhmi zumtu kan si. Cu

biakamhnak cu kan zumhnak ah a biapi ngaingai. Pathian biakamnak cu Khrih ṭhawnnak le amah kan hngalhnak thawngin a ra. “Biakamnak” kan ti tikah zei bantuk miphun, minu le mipa, zei bantuk sinak a ngeimi sermi dihlak nih amah theihhngalh khawhnak kha a chim duh. Biakamhnak a kan tuahmi cu kan caah a sunglawi tukmi laksawng cu a si. Pathian nih bia a kan kamhmi thil cu zei tik caan paoh ah a tlin ter peng. Zumtu hna kan nunnak tu ah aa hngatchanh.

Israel miphun tuanbia kan zoh tikah Pathian nih bia a rak kamhmi hna cu a tlin ter peng. Cu ve bantuk in kan nih nihin zumtu hna zong Pathian nih bia a kan kamhmi cu a tlin ter peng ko lai. “Pathian sining cu nan i hrawm kho lai” tiah Bible nih a kan cawnpiak tikah Pathian sinak kha siloin thianghlimh nun ngeih kha a kan cawnpiak duhmi a si deuh. Pathian kan zumhnak thawngin kan ngeihmi thianghlimh nun nih eihmurnak le thil ṭha lo, kan pum taksa a hrawkhral khotu hi vawlei thil vialte kha a kal tak dih. Kan pum taksa a hrawkhral khotu thil cu kanmah chung lila ah a um. Sihmanhsehlaw, Pathian kan zumhnak thawngin kan nih cu a thianghlimhnak aa hrawmmi zumtu kan si. Kolse 1:13 ah “Muihnak ṭhawnnak chung in a kan chuah i a dawtmi a Fapa pennak chung ah khan him tein a kan luhpi,” tiin a kan cawnpiak. 

“Pathian sunpernak le ṭhatnak i hrawm ve awkah auhmi,” kan sin tikah kan “zumhnak” ah kan chap dingmi thil phun 7 kha Peter nih a vun langhter. Zumhnak kan timi cu kan i ruahchanmi kan hmuh theo lai ti kan zumh le a taktak le a ngaingai a simi thil kan mit in kan hmuh khawh lomi hi an um ko ti kan zumh kha,” a si. Tuahsernak tello zumhnak cu a thi, tiah “James 2:20” ah kan hmuh khawh. Kan zumhnak ah Zumtu hna nih kan i chap dingmi thil hna cu “Thatnak, hngalhnak, mah le mah i uk khawhnak, in khawhnak, Pathian ṭihzahnak, unau bantukin i dawtnak, le zawnruahnak,” an si hna. Cucaah, “Kan zumhnak” cu “Amah Pathian kan theihhngalhnak” kha a si i cu kan theihhngalhnak cu a ṭhawnnak in laksawng pekmi a si.

  1. Ṭhatnak- Zumtu hna nih khamhnak kan hmuhmi hi kan ṭhatnak le kan thil tuah khawh ruang ah a si lo. Efesa 2:8 ah “Khamhnak nan hmuhmi cu nanmah tuahmi a si lo, Pathian laksawng a si,” tiah kan hmuh khawh. Cucaah, kan zumhnak ah ṭhatnak tu kha chap kan i zuam awk a si. Zei bantuk thatnak dah kan chap lai? Pathian sin in a rami nunzia dawh “Filipi 2” Hramhram in Pathian tluk si awk kha cuh awkah a rel lo, Amah lungtho te tu in cu vial cu a hlawt dih i sal sinak tu kha aa lak; minung bantuk ah a cang i minung mui in a lang; mi toiah aa dor i nawlngaihnak lam kha thih tiangin a zulh-vailam cung thihnak kha” timi kha a si. Pathian nih a kan fialmi rian a ṭuan i a lim tu kha “ṭhatnak” a tuahtu cu an si hna. Kan zumhnak ah ṭhatnak lawng siloin “Hngalhnak zong kha” chap chih kan i zuam a herh rih.
  2. Hngalhnak- Hngalhnak kan ti tikah kan tuahmi thil paoh ah Pathian nih pekmi fimnak hmang in zei dah thil ṭha, zeidah thilchia, timi thleidan i cu bantuk thleidan khawhnak fimnak a kan petu Pathian conglawmh kha a si. Filipi 1:9 ah “Nan dawtnak ngeihmi cu hngalhnak a hmaanmi le a chia a ṭha thleidan khawhnak fimnak he ṭhang seh law,” tiah fiang tein kan hmuh khawh.
  3. Mah le mah uk khawhnak- Hlan lio cawnpiaknak dik lo Zumtu hmasa nih kan pum taksa cu a thianghlimmi a si lo caah biapi in kan ruah awk a si lo, tiah an rak cawnpiak hna. Minung pakhat nih amah le amah aa uk khawh nakhnga thil phun kip tuah in a kawl tawn. Hindu hna zong nih “Mithiang” kan si tiin mah le mah uk khawhnak an rak kawl. Hindu nih Khrihfa cu nan Biaknak hi misual hna biaknak a si tiah an ti. Sihmanhsehlaw, nihin Hindu vawlei kan zoh tikah Khrihfa nakin mah le mak i uk khawh lonak ram a si timi kan hmuh khawh.
  4. In khawhnak- Harnak phun kip ton lio ah Khrihfa zumtu pakhat nih kan zumhnak ah chap kan herhmi cu “In khawhnak” hi a si. In khawhnak thawngin thianghlimhnak a chuak tawn. In khawhnak timi le lungsaunak timi hi aa dang. In khawhnak timi cu harsatnak chungin luat khawh nakhnga zei bantuk thil paoh in le tuar caan ah hmanmi biafang a si.
  5. Pathian ṭihzah- Pathian ṭihzah kan ti tikah Amah Pathian nunzia ngeih i zuam kha a chim duh. Nifatin kan nunnak ah Pathian conglawmh, thangṭhat le pehtlaihnak ngeih peng kha a chim duh. Pathian nunzia ngeih lo, conglawmh lo, thangṭhat lo le pehtlaihnak ngeih lo cun Pathian ka ṭihzah ko tiin kan ti kho lai lo. Pathian mui keng in sermi kan si bantuk in Amah ṭihzah cu kan zumhnak ah kan i chap hrim a herh.
  6. Unau bantuk in i dawtnak- Chuahpi unau karlak dawtnak zeitluk in dah a biapit ticu “Chuahpi unau hmanh a daw lomi nih zei tin dah hmuh khawh lomi Pathian cu ka dawt tiah a ti khawh,” tiah 1 John 1: 11 Bible ah kan hmuh khawh. Chuahpi unau dawt kha hi ka zawn ah a chim duhmi a si lo, kan innpa le kan hawikom hna kha kan unau bantuk in dawt kha a chim duh mi cu a si. Unau bantuk in kan dawt hna ahcun Pathian kan dawt tiah kan langhternak a si ve. Pathian kan dawt kan timi cu a nawlbia zulh kha a si.
  7. Zawnruahnak (Love-Agape): Hi ka zawn ah kan pa David Van Bik nih “Zawnruahnak” tiin a kan leh piak. Sihmanhsehlaw, Mirang Bible ahcun “Dawtnak” tiin kan hmuh khawh. Greek biafang a rak hman ning ahcun “Agape” ti a si. “Agape” dawtnak timi cu Dawtnak vialte lakah a sunglawi bikmi Dawtnak a si. Agape dawtnak kan ti tikah “Ruang ngei lo Dawtnak” kha a chim duh. Zawnruahnak kan ti tikah “Cu bantuk minung a si ruang ah” timi lungput ngeih loin “Pathian Dawtnak” Agape Dawtnak in midang cung ah Dawtnak ngeih kha a kan cawnpiak. Dawtnak cu Nawlbia Pakhatnak le a ngan bik a si. A hmun zungzalmi thil pathum “Zumhnak, Ruahchannak le Dawtnak” an um sihmanhsehlaw a ngan bikmi cu Dawtnak a si. Cucaah, Kan zumhnak ah Dawtnak aa tel lo cun kan zumhnak cu pakpalawng a si hnga.

Hi thil 7 hi zumtu hna nih nifatin kan zumhnak ah kan i chap ding thil an si hna. Hi thil 7 kan zumhnak ah a chaptu le chap lotu zumtu cu kan nunnak ah aa dang hrimhrim. Cucaah, nifatin kan nunnak ah hi thil phun 7 hi kan zumhnak ah a chap khotu zumtu kan si khawh nakhnga hi ca a reltu kan/nan dihlak Pathian nih a thar in thluachuahnak in pe hram ko hna seh. Amen!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s