π—™π—œπ— π—§π—›π—œπ—”π— π—‘π—”π—ž 𝗖𝗨 π—¦π—¨π—œ π—‘π—”π—žπ—œπ—‘ 𝗗𝗨𝗛 π——π—˜π—¨π—› π—Ÿπ—”π—ͺ π—‘π—šπ—¨π—‘ π—‘π—”π—žπ—œπ—‘ π—œπ—§π—›π—œπ—  π——π—˜π—¨π—› (Phungthlukbia 16:16)

BiahmaiαΉ­hi

Kum 2019 a donghnak lei thawk in tuni tiang vawleipi nih COVID-19 zawtnak pulrai cu kan ton i ahlei in Kawlram nih tulio ah thinphan dai lo in kan ton. October 4, 2020 tiang MoHS report ning cun Kawlram ah COVID-19 zawtnak a ngeimi minung 17794 an si i, hi zawtnak in a nunnak a liam cangmi minung 412 an phan cang. COVID-19 zawtnak nih kan fale fimcawnnak tiang zong a hrawh dih. Sihmanhsehlaw, hi COVID-19 zawtnak nih kan fimcawnnak cu a kan ngol ter awk a si hrim lo. USA President hlun J.F. Kennedy nih β€œkan ram dirhkamhnak ding caah fimthiamnak hi kan hriamnaam pi cu a si ko,” tiah a rak chim. Kan ram le kan miphun, kan khrihfabu, kan innchungkhar caah fimthiamnak a herh. Cucaah, zeitindah hi COVID-19 zawtnak kan ton lio ah fimthiamnak cu kan fale nih sui nakin an duh deuh awk a si i ngun nakin an i thim deuh awk a si, timi cu a tanglei ah kan vun zoh αΉ­i hna lai.Β 

Phungtlungbia cauk chung ah zeitluk in dah Israel mi hna cu saltannak in an luat hnu ah an ram sersiamnak ding caah nu pawl nih thazaang an rak chuah timi kan hmuh khawh. An fa le fimthiamnak an kawlnak ah zeitindah an cawlcangh ning kha kan hmuh khawh rih. Sianginn kan kai tikah kan sianginn kong he pehtlai in thil pakhatkhat um tikah pa nakin nu nan teima deuh…Tuni kan thil tuah ning hi Israel mi hna zong an ram sersiamnak ding caah an fa le cung ah nu nih αΉ­uanvo tampi an rak lak. Fimthiamnak timi biafang zong hi Biakam Hlun ah cun Nu he a pehtlaih ter tawn. Israel mi hna sal an tannak in an luat hnu ah an ram sersiamnak ding caah Nu nih biatak te in an fale kha an cawnpiaknak, fimchim in hma an rak la ve. Cu ve bantuk in kan nih zong COVID-19 zawtnak ruang ah kan fale sianginn kai kho loin um hna hmanhsehlaw nulepa nih kan fale fimcawnnak ah zaanghlei cawi in kan αΉ­an a herh. Cheukhat kan fale cu Social Media hmang in sianginn an kai khawh nakhnga thazaang kan chuah chih. Kan fale kan sersiam khawh nakhnga atu tein fimthiamnak cu kan kawl ter hna a herh. 

Phungthlukbia Daal 9nak ah kan hmuh khawh rihmi cu Nu phun hnih an si. Afimmi le ahrutmi kong a si. Innchungkhar ah fale nih lawmhnak an chuahpi tikah hringtu nulepa cu an fim tinak kha si ko. Cun Nulepa zong kha sersiamnak ah tei an ma. Inchungkhar ah fale nih ngeihchiatnak an chuahpi tikah hringtu nulepa nih an cawnpiak hna ning kha alangh ter. Cucaah Church School kan fale zong hi COVID-19 zawtnak kan ton lio caan ah an fimcawnnak cu kan hngol ter awk hrim a si lo. 

Rom cu Latin Khuaram lakah ram hmete pakhat a rak si. A hnu ah Rom cu a lianngan chin lengmang i Rom Pennak (Roman Empire) tiang a rak phan. A pawngkam khua vialte a uk dih. Grikram chung vialte Rom nih a va tuk i a tei dih hna. Cu tikah Grik mifim tampi cu sal ah an tlaih hna i Rom ah an ratpi hna. Cuticun Grik mifim le cathiam tampi cu Rom uktu hna caah sal rian an αΉ­uan. Mitthlam in hei suai ahcun Rom uktu nih Grikmi cu minung tinvo vialte an pe hna lo, an duh paoh in an tuah hna.

Sihmanhsehlaw, Rom pennak cu duhsah tein a αΉ­umchuk ziah mah. Aruang cu Rom ralbawi hna nakin an sal simi Grik pawl ca an thiam deuh pinah an fim deuh i a si. Rom uktu upa hna nih an fale cachimtu ah an sal a simi Grik pawl an hman hna. Cucaah, Greek philosophy nih Rom uktu hna fale cu nun a rak chimh hna. Paul zong nih Rom cakuat a αΉ­ial tikah Latin holh a hmang loin Grik holh a rak hman. 

Israel miphun hna cu saltannak in an luat tikah nu hna nih an innchungkhar, an fale sersiamnak ding caah thazaang tampi an rak chuah i an cawlcang. Greek miphun hna cu Rom kut tang ah an rak um nain an fimthiamnak nih an uktu bawi hna cu a rak tei i an nunphung le an caholh cu vawleipi tiang a cul ter dih. Kan fale fimcawnnak an kawl lio nulepa nih thazaang tampi kan rak chuah ko lai. Sihmanhsehlaw, COVID-19 zawtnak kan ton ruang ah sianginn kai kho loin an um caan, Social Media hmang in sianginn an kai lio ah zaanghlei cawi in kan thazaang chuah rih ko hna u sih. Kan fale nih fimnak cu sui nakin an duh deuh i ngun nakin an i thim deuh khawh nakhnga fimnak hrampi Pathian nih kan dihlak caah thluachuah kan pek piak ko seh. Kaa lawm. 

NOTE: Lai Baptist Church, Yangon CE Department hruainak in Online Church School Cawnnak ah October 4, 2020 ah ka chimmi a si.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s