DAWTNAK IN HRUAIMI CHINRAM (Beechy Ram Tin Thang)

Kum 2020 Kawlram thimnak cu tlamtling tein a dih cang i Chin State ah National League for Democracy (NLD) nih 92% in teinak a hmuh. Teinak a hmutu Party kan lawmhpi hna. Hi thimnak ah a sungmi caah “Teinak” a tlau hlei rih lo. Chinram cu Khrihfa ram a si, tiah kan chim. Khrihfa kan sinak nih mipi thilrit chan kho loin a um tikah kan ramkhel sining le kan miphun karlak ah buainak cu a chuak (hrimhrim) lai. Eric O. Hanson nih, “Kan nunphung kilven le ral lak in kan mipi ven cu ramkhel a si,” tiah a chim. Cucaah, 2021 thawk in a kan hruaitu ding hna nih kan ram cu Dawtnak in a kan hruai a herhnak keimah pumpak ka hmuh ning ka vun langhter.

Dawtnak in Hruaimi Chinram

Kan chim cia bantukin Chinram cu Khrihfa ram a si caah a kan hruaitu ding zong hi tam deuh cu Khrihfa (taktak) an si. Cucaah, Khrih nih a ngeihmi lungput in kan miphun hruai a herh. Mipi nih harsatnak, tlaih le khih, innhmun hrawh piak, thilri tiang chuh le hrawh piak tiang an ton caan ah an zoh sawhsawh awk a si lo. Chin miphun nih kan herhmi hruaitu cu dawtnak in a khatmi hruaitu a si. A kan hruaitu cu tangka, chawva le laarnak, lenglei minṭhatnak a uarmi an si hrim lo. Kan herhmi hruaitu cu Pathian a ṭihzahmi, zumhtlakmi, dinfelnak a aupi i mipi he nun aa hrawm khomi a si. Pathian nih vawlei a dawt hringhran caah a Fapa ngeihchunte cu a kan pek (John 3:16). A kan peknak aruang tampi lakah zatlang dinfelnak, ramkhel namchuknak in luatnak, nuhrin covo dirkamhnak, zalong tein umnak hi an itel ve. Nuhrin covo khamh (phih) le zikhnawh eihmuarnak in ram hruai cu Khrih nih a Fapa ngeihchunte a kan peknak aruang ah aa tel hrim lo. 

Martin Luther King Jr. nih, “Mipi nih harsatnak an ton caan ah dai tein a ummi Khrihfa (Khrihfabu) cu a thimi Khrihfa (Khrihfabu) a si,” tiah a chim. Chin miphun nih harsatnak kan ton caan ah cunglei ṭih ruang ah dai tein a ummi hruaitu cu a thimi hruaitu a si. Cucaah, a kan hruaitu nih Chin miphun cu kan ral kut in nunnak khamh, ven le nuhrin covo dirkamh ding rian an ngei. Chinram cu Khrihfa ram a si tiin kan aupi len nain Kawlram chungah zikhnawh eihmuarnak ah pakhatnak a (rak) si. Hi thil hrimhrim cu 2021 thawk in a kan hruaitu hna nih zero a si khawh nakhnga rian nganpi nan ngei. Zeitindah hi thil a um rih ahcun Chinram cu Khrihfa ram kan ti ngam hnga? Khrih Pennak cu Chinram ah a tlun khawh hnga? Chin miphun nih kan luatnak cu kanmah tein kan lak awk a si. 

A kan hruaitu hna nih Chinram ah Khrih Dawtnak le Pennak a tlun khawh nakhnga thil ṭha lo le sualnak cu kan doh hrimhrim a herh. Chin miphun nih Biakinn kan kal tikah Pathian cu Biakinn leng ah a rak um caan a um (kho). Kan mipi nih a kan herh caan ah caan kan pe khawh hrim a herh tuk. Mipi nih an herhmi an umnak hmun ah a phanh khawh nakhnga a tuahtu hruaitu kan herh. Kan peng, tlang, chungkhar, hawikom tibantuk sin lawng ah an herhmi tuahpiak le va bawmhchanh kha kan tuah awk a si lo.

Kan mipi kan dawt hna lo cun Pathian ka dawt ko kan ti awk a si lo. Mipi cungah dawtnak ngeih loin rian ka ṭuan kho ko timi ruahnak kan ngeih awk a si lo. Mipi nih thimmi kan si. Prophet Amos nih, “Nan puai hna cu ka huat hna i zei ah ka rel hna lo, nan sunhsakmi nan pumhnak hna cu ka duh hna lo. Nannih nih nan raithawinak hna le nan thawhlawm hna kha nan ka pek tikah ka cohlang hna lai lo, raithawinak ca i nan hmanmi saṭil hna zong kha ka cohlang duh hna lai lo. Nan hla aw kha ka theihter ti sawh hna hlah u; nan thonglawi aw kha ka celh ti hna lo. Sihmanhsehlaw biading kha ti bantukin luanter u law dinnak kha a cat lomi tiva bantukin luanter camcin ko u,” tiin amah chan biaknak leiah pum aa pe tuk ko nain mipi harsatnak ah nun aa hrawm kho lo i dinfelnak nun a ngei lomi hna cu a rak chimh hna. Johan cakuat zong nih, “Mi zeimaw nih, Pathian ka dawt, a ti i a unau a huat ṭung ahcun, amah cu mi lihchim a si. Zeicahtiah a hmuhmi a unau hmanh a dawt khawh lo ahcun a hmuh lomi Pathian cu a daw kho lai lo,” tiah fiang tein zeitluk indah kan unau dawt a herh timi a kan cawnpiak. 

Dawtnak timi cu tuahsernak aa tel. Samaritan tuanbia kan zoh tikah tlangbawi le Levite nih zeidah sualnak kan tuah timi an ruat lo. Mipa thil zeihmanh an fir piak lo, harnak zong an pe hlei lo. Sihmanhsehlaw, harsatnak a tongmi mipa an bawmh lomi cu sualnak an tuah a si. Kan mipi nih harsatnak an ton caan ah dai tein kan um cu sualnak kan tuah caan a si. 

Cucaah, 2021 thawnk in Chinram a kan hruaitu ding hna nih mipi harsatnak k/an ton caan ah dai tein an um awk a si hrim lo. Chinram cu Khrihfa ram a si bantukin a kan hruaitu hna nih kan ram cu Dawtnak le Dinfelnak he a kan hruai awk a si. Dawtnak he kan mipi kan hruai lo cun Khrih nih kan raithawinak a kan cohlan duh lai lo. Khrih nih cohlanmi raithawinak kan pek khawh nakhnga Dawtnak le Dinfelnak cu a cat lomi tiva bantukin Chinram ah luanter camcin ko u si. 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s